Senin, 21 Desember 2009

Astaga
Lagi-lagi kita baru dapa inga
Batulis diari
Kalu so akhir taong
Kalu bagini trus
So bukang catatan harian depe nama
Mar so jadi catatan tahunan
Bagini no kalu so tasadap batulis
Puisi, novel, naskah drama deng cerpen
So jadi lupa tu diari

Terpaksa samua yang ada jadi ni taong
Kita kumpul satu kali
Apalagi taong 2009
Salah satu taong paling spesial
Deng penuh momen berpengaruh
Pa kita pe hidop

setelah amper 8 taong jadi mahasiswa
akhirnya tu gelar SS boleh
tatempel di blakang nama
satu kali lipa lebe lama
dari waktu normal
mar nya sia-sia dabaforo
lama bagitu di kampus
banya hal yang kita blajar
bukang Cuma sekedar kase klar
tu beban SKS

kita sanang le
ini taong Theater Club
boleh mo dapa juara 1
festival teater se-sulut
yang dorang ada beking di Taman Budaya
6-7 November
pentas pake kita pe naskah
depe judul Metamorcrazy
kita nya barmaing
Cuma jadi sutradara

Bole jo
Latihan Cuma 1 minggu
Mar boleh dapa hasil maksimal
Apalagi yang daiko
Orang-orang teater sulut samua generasi
Dari 70-an sampe 2000-an
Ada Om Oni Sangeroki, Om Icha Rhemrev, Om Angky Kalumata
kita pe tamang Vicks Ungke deng Ompie “Rambu Gorilla”
Menurut om Erick Dajoh yang ada bajuri
Kita kata maso generasi 2000-an
Ha..ha..ha.. paling bungsu dang?
Rupa-rupa jo ni om Erick

Pas bulan November
Kita iko tes PNS
Cuma modal doa deng pingsil 2B
Nyanda ada Koneksi
Apalagi doi
Mar ternyata butul
Kalu Tuhan so berkehendak
So nyanda mo lari tu barang

Memang mantap katu ini taong
Biar banya deng lalah
Mar samua nya sia-sia
Manusia berusaha, Tuhan yang menentukan
Kalu manusia nyanda berusaha
Tuhan nyanda menentukan apa-apa
Butul to?
..Amin..