Latah Intelektual

Hei tamang
Tau nyanda ngoni
Kalu skarang
lagi tren
Latah intelektual
Tren yang berkembang di kalangan orang-orang sorodo

tren bakumur kata-kata ilmiah
Sampe bagabu tu lidah
tren elaborasi macam-macam teori
Sampe ta muntah-muntah

Samua fenomena luhe-luhe deng analisis
Spaya lebe mantap tu jati diri
Sbagai “budayawan”

Memang tragis
Ruang intelektual jadi tampa bapose
Tampa orang-orang ba make up
Deng macam-macam referensi
Spaya dapa lia fasung
Di mata masyarakat

Memang mengkhawatirkan
Ruang intelektual jadi pece
tampa orang-orang cari top
tampa orang-orang cari nama
mungkin dulu ambisi jadi artis
mar nya pernah kesampaian

Kasiang skali
Ruang intelektual jadi candu
Tampa orang se tunjung power
Tampa orang-orang makang puji
Beking-beking malimbuku fenomena
Spaya katu lebe dapa lia tu kesan
Sbagai orang cerdas


Tau nyanda ngoni tamang

Kalu skarang
Ruang intelektual
jadi tampa anjing-anjing
Baku-baku reno
Deng anjing-anjing laeng

Kalu skarang
Ruang intelektual
jadi tujuan
Dari orang-orang krisis identitas
Bukang jadi jalang
For mo bangong ni peradaban

So bole jo
Kembalikan intelektual
Ke hakekatnya
for bangong ni kebudayaan

So cukup jo
Kembalikan intelektual
Ke hakekatnya
for tampa torang
cari jalang kaluar

Bukang jadi tampa
ngoni
Beking-beking diri
Anjing-anjing!!!

7 Maret 2010