Sabtu, 08 Mei 2010

Hari sabtu memang hari paling sadap
For pns
Hari for kase rileks ini pikiran
Senin sampe jumat
Punung deng hal-hal
Yang beking ini otak penat
Hari jumat kalamaring
Kita pulang kantor
Biar masih stenga 11
Bukang mo lari dari tanggung jawab
Mar memang so nya ada
Hal penting yang boleh mo beking
Kita trima sms dari Cupez
Dia bilang tu acara di Tondano somo mulai
Peluncuran edisi pertama
Majalah Waleta Minahasa
Abis basinggah di bank
Kita langsung nae gunung ka tondano

Ujang kras skali
Spanjang jalur tomohon-tondano
Sampe terminal kita deng Waty takurung
Deng ini ujang yang nya kanal ampung
Bendi tasopu nanti so stenga jam

Di terminal ini kita sama deng banostalgia
Deng dulu-dulu
Waktu kita skolah di sini
15 taong lalu
So pe lama
Mar dapa rasa rupa sama deng 3 taong lalu
Waktu slalu dapa rasa laju
for orang-orang yang menanti
Nintau menanti apa

Ujang masih kras
Beking ini bendi
Sama deng da balayar di lao
Gerimis bapancar pa kita pe muka

Kita lia ini Tondano
Nyanda banya brubah
Deng 15 taong lalu
Cuma memang katu skarang
Dapa lia lebe bersih sadiki
Yang laeng so kurang sama jo
Cuma babagitu
Kita jadi batanya dalang hati
Apa yang om Vreeke da beking
Slama 2 periode pimpin ini Minahasa?

Sampe di muka hotel Toudano bendi brenti
Kita lari deng pece-pece ka dalang
Ternyata depe seminar so lama mulai
Ada Denni Pinontoan, Green Weol, Fredy Wowor yang jadi pembicara
Bicara tentang budaya deng filsafat Minahasa yang so nyanda ada
Pa orang Minahasa skarang

Banya komunitas deng tokoh masyarakat
Yang datang
Beking ini diskusi jadi hidop skali
Kita lia ada Bert Supit, deng Johny Weol
Dudu paling muka
Abis lia Waleta Minahasa pe isi
Kita nya bisa sembunyikan rasa bangga
Akhirnya Minahasa punya majalah budaya
Yang padat deng berkualitas rupa ini
Memang satu usaha yang bagus dari tamang-tamang budayawan muda
Mar lebe bagus deng paling penting
Bagimana mo beking ini majalah boleh bertahan
Di dalang pusaran waktu
So banya torang lia
majalah ato media lokal
Yang akhirnya tutu buku
Karna nya mampu mengimbangi
Kekuatan kapital

Kita dapa inga
Tu Raudal Tanjung Banua da bilang
Waktu diskusi di sonder minggu lalu
politik kesusastraan sentral
So beking sastra jadi sempit
Karna distandarisasi
Oleh sekelompok eksklusif orang
Yang merasa punya wewenang menentukan
Kaidah sastra Indonesia
Kita bilang pa Raudal
Torang di Manado nya pusing deng itu samua
Sastra Manado punya prosesnya sandiri
Minahasa tetap bapikir deng berkarya
Deng lahirnya ini Waleta Minahasa
Proses bapikir deng berkarya yang ada di Minahasa
akan menyejarah secara terus menerus
Smoga bertahan Waleta Minahasa...