Rabu, 23 Desember 2009

Sore-sore bauni televisi
Ada acara tebak lagu
Depe peserta anak-anak kacili
Yang hele mo lap ingus sto nintau
Kasiang skali
Anak-anak umur bagitu
Dorang suruh tebak
Orang dewasa pe lagu
Yang so pasti depe tema
Berkisar cinta deng depe tetek bengek
Kita dapa inga waktu masih kacili
Banya lagu anak-anak yang da hits
Banya penyanyi anak yang berjaya
Eno Lerian, Bondan Prakoso, Puput Melati
Deng laeng-laeng
Skarang dorang so jadi artis dewasa
Mar so nya ada dong pe pengganti
Kasiang ni anak-anak skarang
Dipaksa nikmati hal-hal
Yang bukang dong pe dunia

Kita ada lia le brita di televisi
ketua DPRD di satu daerah
Beking ritual for mo user mahluk halus
Dia bilang tu mahluk halus ja teror pa dia
Sampe mo bunung depe satu keluarga
Nya Cuma dia
Depe anak buah anggota DPRD laeng
Le kata dapa rasa hal yang sama
Kita pe dugaan
itu rakyat miskin pe roh
yang mati gara-gara kelaparan
ato mungkin sto depe saingan pe roh
yang mati bunuh diri
lantaran nya tadudu di dewan
bahaya le ni anggota dewan skarang no
enter kan mahluk halus so
ja baku musuh deng dorang

pesulap-pesulap skarang le so bahaya no
sampe orang pe rahasia dong
bole bongkar deng hipnotis
kiapa kang pemerenta nya
kerja sama deng dorang
suruh hipnotis tu koruptor-koruptor
spaya dorang so nimbole ba tai minya
ato dong tako sto
jang deng dorang le dapa hipnotis
he..he..