Kamis, 13 Mei 2010

Musim pilkada
Memang musimnya demo
Kalamaring dulu
Demo anti korupsi di Pemkot Manado
Tentang guru-guru pe tunjangan
Yang blung pemerenta bayar
Satu orang depe orator
Yang laeng Cuma sibuk babataria
Dari “hidup rakyat”, “hidup mahasiswa”, sampe “hidup Persma”
dorang so cumu

Kita pe dalang hati
So nya butul ini
Demo for kepentingan guru
Mar yang muncul
orang-orang mabo
kong punung deng tato

Cukurungan
Preman samua ini
Sapa le te di blakang pa dorang
Kalu bukang lawan politik
calon incumbent

nya cuma itu
Kalamaring
Muncul ulang le
demo nda jelas
Kali ini dari organisasi “Antra”
Organisasi para nelayan
Kalu sebelumnya
Cuma kapala badan Kesbang
Pak Mewengkang yang mangada
Skarang komang PLH walikota langsung
Roby Mamuaja yang mangada
Ada le Sekkot GSV Lumentut
Asisten I,II
Deng pejabat-pejabat laeng

So rupa-rupa ni orang-orang pe tuntutan
Dapa lia kurang beking-beking
Yah, namanya politik katu
Apa saja dong halalkan
Yang penting berkuasa..

Demokrasi beking orang-orang kotor
Orang-orang nya ada kapasitas
Punya kesempatan
pimpin pemerintahan

Pemimpin bodok
Adalah akibat dari pilihan
rakyat yang bodok
So bagitu resiko demokrasi

Lengkali kita ja bapikir
Torang butuh satu orang
Diktator
Spaya boleh mo ator ni rakyat-rakyat
yang bodok
Deng karas kapala..