Rabu, 27 April 2005

Banya orang-orang top
Kalo so musim ba ganti Tonaas
Baku rebe paling suci tu hati
Baku lawang paling jago tu akting
Hele Johnny Depp pe watak mar anyor
Nda ada angin nda ada ujang
Beking tu nda war war
Dari lempar-lempar doi di jalang
Sampe pukul ba gate deng tu jap jap dilorong
Soalnya inga,
dong pe pengaruh bukang sambarang Ca’
Yang laeng sampe rupa tu butul butul
Jadi manajer klub bola
Riki ganti julukan tong pe klub bola kesayangan
Kalo julukan lemah lembut bagitu
Bagimana mo semangat tu pemain di lapangan
Ada yang bapaksa maju
Biar de pe anak terlibat kasus tawuran
Hi, kasiang jo
Kase butul jo tu keluarga
Baru mo urus masyarakat
Sapa pun de pe tonaas
Kalo tu budaya tai minya masih ba akar
Jang harap torang mo maju
Pemimpin yang tai minya
Beking rakyat jadi tai minya enteru