Minggu, 1 Agustus 2010

Oh,.. dapa sayang
Tu bola kaki di Indonesia
Dari dulu nda pernah berubah
Slalu punung deng keanehan
Kita masih inga
Tu kasus mafia wasit
Yang heboh taong 90-an
Sampe tu bola kaki gajah
Waktu pemain Indonesia
Isi gol di gawang sandiri

Oh,.. kasiang
Sampe ini malam kita bauni final piala Indonesia di TV
Sama deng da bauni opera Van Java
Rasa-rasa mo tatawa sampe polote

Pertandingan babak ka 2
Arema lawang Sriwijaya
tatunda sampe satu jam
lantarang Kapolda Jateng nya trima
keputusan-keputusan wasit
di babak pertama

memang garap
skarang Kapolda so ja merangkap
sbagai ketua PSSI

Apa kasiang wasit pe salah say?
Kiapa, gara-gara ada kase kartu merah pa Arema pe pemain?
Ya, wajarlah...
Bermaing bola le ka latihan kungfu
Masa’ tu kaki angka sampe di langit
Mo skop bola ka mo skop orang pe kapala say?

Mar ini bola kaki sob
Terlepas wasit ruci ato nyanda
nya ada yang berhak mo intervensi
sampe minta wasit musti ganti

di mana PSSI pe wibawa kasiang?
Masa’ PSSI pemegang kendali tertinggi
Pihak laeng mo ator-ator

Piala Dunia blum lama ada abis
Kita masih inga
bagimana Inggris pe saki hati
waktu Lampard pe gol lawang Jerman
wasit anggap bukang gol
Mo Fifa, mo pemain, mo pelatih, mo penonton di rumah tau
kalu itu gol sah
Mar mo beking apa?
So bagitu wasit pe keputusan
Pertandingan tetap musti lanjut
Nanti abis itu baru Fifa kase sangsi pa tu wasit

Mar di Indonesia?
Polisi garida mo intervensi
Pertandingan bola
Ha..ha..ha
Musti so kwa pak polisi?
Lebay ah...
Urus jo ke’ tu koruptor
Kyp so nya ada karja so di kantor pak kapolda?

Mo lia bola kaki Indonesia
Sama deng da lia wajah keseluruhan
ini negara
Nya ada wibawa
Nya ada ketegasan mo tegakkan aturan