Sepercik Deja Vu Yang Nyanda Lunas

Bajalang sandiri di pagi buta, harum hangat tabako
Redakan gigil sepi yang baru klar.
Jalang kita manjae, tanpa benang harap,
cuma dingin yang manyanyi pelang.
Kong kita pun kehilangan
bara yang sempat manyala di dada, kala torang dua
pe jemari berpagutan, di jalang ini.
mar waktu itu nda ada gigil yang basoso
nyanda ada runcing dingin tembusi pori-pori
Cuma kerling torang pe rasa yang sederhana
Getarkan sisa-sisa gelap yang payungi ini jalang

Kong ngana bise pa kita satu kata sederhana:
Tentang riak kenangan yang so klar torang tuntaskan.
Abis itu kita lia ngana pe kening, masih ada sepercik warna, basilau, masih ada ambisi yang amper patah
Mar kita tau, sebuah kecupan nda akan bisa
mengabadikan warna itu
Kita pun kase biar ni bibir membeku, bercinta deng kesendirian abad, bercinta deng hangat wangi tabako.
Kong ngana gandeng kita pe tangan
jambak kita deng senyuman membayang
Mar kita pe hati so terlanjur dirampas ombong
yang rupa cermin pantulkan kekakuan pa kita pe jiwa

Kita trus bajalang, sambil balia tulang-tulang rapuh
talimburang di tenga jalang. nyanda ada sketsa
ato sehelai kartu nama, hanya aroma kekalahan
bagentayangan, memburu tangkapan berikut

Pagi ini ada sepercik Deja Vu yang nyanda lunas
Saat kita mulai belajar bersenggama deng sejuknya
perjalanan sepi, saat ngana pe muka jadi
takdir yang terhalang tembok, terhalang kegilaan zaman.

Februari 2009