11 tahun lalu terakhir kita tulis diary
Kita sempat bapikir mungkin nda akan lagi mo tulis diary
Dapa rasa so nda jaman deng so nda relevan di era digital skarang
Mar ternyata hari ini kita batulis ulang
Setelah kita baca baca ulang diary yang lama lama
Ternyata banya hal yang kita so lupa
dapa inga ulang karna terdokumentasikan di tulisan-tulisan yang sederhana ini
apalagi kita dari dulu memang memilih batulis catatan harian pake bahasa Manado
Dapa rasa lebe nyaman, lebe bebas, lebe intim, lebe relate deng pengalaman sehari-hari
Deng ternyata diary memang cara paling efektif, paling sederhana, paling gampang
For mo malawang lupa
for mo jadi memori deng warisan ingatan di masa depan
Karna itu mulai hari ini sepertinya kita nda akan lagi brenti tulis catatan harian
Selama ini diri masih hidop deng masih mampu mo batulis
Tadi malam kita baku dapa deng Christy Sondey
Tamang lama paling karib deng kental
Nongkrong dari malam sampe pagi pa depe rumah
Bacirita seni, musik, sastra, ingatan-ingatan masa lalu
Serta kerandoman-kerandoman laeng
Seperti biasa, kopi deng Cap Tikus beking obrolan nda brenti mengalir
Ada juga anak-anak Theater Club yang muncul
King, Achi, deng anggota-anggota generasi Z yang
Kita so nda hafal samua dorang pe nama
Kadang di umur bagini salah satu kenikmatan paling mahal
Adalah dudu bacirita deng orang-orang satu frekuensi
Bacirita deng tamang-tamang yang tahu Pearl Jam, Pramoedya,
Smashing Pumpkins, Zapatista, dll.
Kenikmatan yang puluhan taong lalu jadi rutinitas sehari-hari
Mar skarang so jadi barang langka
Jaman katu memang so berubah
Apalagi skarang kita pe waktu paling banya di kantor
Bergumul deng kerja-kerja pengawasan di Inspektorat
Meski lingkungan kurang kondusif
Mar kita menikmati ini karja bagini
Hari-hari bergelut dengan konsep deng analisis
Untuk ketidaknyamanan lainnya abaikan jo dulu
Masih banya sebetulnya yang kita suka mo tulis
Mar nanti lanjut jo di laeng hari
Somo tenga malam, yang penting so reuni ulang deng ini diary..
