Sabtu, 28 November 2015

Sama deng biasa
Hari sabtu nyanda ada depe libur
Banya sambutan Walikota yang musti
Kase klar
Akhir taong bagini memang depe padat padat
Banya agenda yang tajadwal
Apalagi kurang mo rekeng hari
Walikota periode 2010-2015, GSVL somo purna tugas
Siang menjelang sore kita kaluar rumah
Sebelum ka kantor basinggah dulu di 45
Mo permak kita pe sragam linmas
yang talalu basar depe tangan
jalang di pusat kota dapa tako depe macet
ini oto oto deng motor motor so nya dapa ba napas
Tiap baku lewat deng ini oto oto yang pe padat
Kita bahoba di jendela
Sebagian besar oto depe isi Cuma 1 orang alias sopir
Ternyata kote ini Manado pe macet bukang karna
Jalang so nda mampu
Manado taprop karna tingginya biaya makang puji
Coba kalo ini orang orang di oto so nae mikro ato motor
Nyanda ada istilah mo taprop bagini
Jalang manado sasa’ deng oto oto
Yang nyanda ada depe isi

Kamis, 26 November 2015

Seiring waktu yang baputar
Banya hal le yang baku iko tarubah
Bahkan cinta yang banya orang bilang abadi
Tetap mo pudar takikis deng waktu
Klo mo inga dulu dulu
Waktu torang masih parcaya klo cinta
Mati nda mo dapa ganti
Kurang mo beking tatawa sandiri skarang
Mar jaga beking rasa grap
Klo baku dapa deng orang yang lama
Nyanda baku dapa kong dorang masih
Anggap torang masih sama deng dulu
Padahal so deng taong ada tapisah
So dorang ini yang nyanda jaga blajar dari pengalaman
Karna orang yang salalu blajar pasti  trus berubah
Deng nyanda akan heran deng perubahan