Sabtu, 14 Desember 2013

Setelah 10 taong lewat

Yang kita inga

Torang dua pernah baku dapa

Di muka perpustakaan Unsrat malang-malang

Ngana pernah bilang

mo baku riki pulang

karna sebe da pesan

jang lupa kase makang anjing

ngana pernah cirita ada laki-laki

da dusu-dusu pa ngana

sampe mangamu deng peda di muka rumah

yang kita inga

torang dua pernah nae ojek batiga

so malang pigi pa kita pe rumah

kita pernah pigi pa ngana pe rumah

kong ngana kase makang kolombi

torang dua pernah bacirita

di fakultas sastra sampe pagi

kong ngana tatidor pa kita pe pala-pala

yang kita inga

ngana pernah kase tunjung

ngana pe puisi-puisi

pas torang dua dudu di muka ngana pe rumah

torang dua sempat baku janji

mo bauni Slank di stadion Klabat

mar nda jadi gara-gara

kita nda angka-angka ngana pe telepon

yang kita heran

kita tiba-tiba inga pa ngana

ini malang

Rabu, 11 Desember 2013

banya hal yang seharusnya sederhana

di dunia ini

walau nyanda samua hal itu sederhana

banya yang torang nda perlu beking

mar torang beking

banya yang torang musti beking

torang nda beking

torang slalu tagila-gila deng penyesalan

tagila-gila deng tanda tanya

mar hidop trus baputar

torang nimbole badiang

badiang berarti tumbang

tumbang, sama jo deng nda pernah hidop

Sabtu 31 Desember 2011

Saki ini talinga ada dengar petasan

Kurang sama deng perang dunia ka 2

Pergantian taong kita Cuma di kamar

Baca-baca ulang karya-karya lama

Sambil kase trus tulis novel kadua tentang Permesta

Pokoknya taong 2012 ini novel so musti klar

So lama ini da tatunda gara-gara kurang daurus-urus tu laeng

Ternyata kote banya hal kita da lewati di taong ini

Dua naskah drama yang kita tulis

Jadi pentas produksi Theater Club

Pentas produksi Opera Van Sastra bulan November

Naskah eksperimen yang kita tulis

For mo beking segar pertunjukan teater di sulut yang kurang babagitu jo.

Biar masih banya kekurangan

Mar apresiasi penonton dapa tako depe meriah

Pentas produksi Republik Tikus

Pas bulan Juni kita nda bisa terlibat

Karna sementara iko diklat Pustakawan ahli di Jakarta

Bole jo ini taong Theater Club so ada sadiki kemajuan

Dua kali pentas produksi

Deng diskusi seni rutin

So bajalang

Kamis, 30 Juni 2011

3 bulan lewat

Sertifikat pustakawan ahli so di tangan

Skarang kita so di rumah ulang

Setelah lewati perjalanan yang melelahkan

Banya hal yang tatinggal di hati

Nya Cuma ilmu perpustakaan

Mar pengalaman baku kanal

Deng orang-orang amper dari samua provinsi

Ngoni memang orang-orang bae

Pak Achyadi Sulfi dari Purwokerto

Pak Agustinus Sombolayuk orang Toraja dari Papua

Pak Fatchur Rochman dari Jember

Ady Kaltri dari Samarinda

Pak Yusak Maifa dari NTT

Pak Kaharudin dari NTB

Suryadi, Muhammad Yusuf, deng samua-samua sahabat laeng

Kita nya mo lupa pa ngoni

Karna ngoni so

kase tinggal sesuatu pa kita pe hati

Selasa, 17 Mei 2011

So mo amper 2 bulan kita di sini

Di kota yang slalu baisap

Orang pe raga

Stiap hari blajar sesuai jadwal

Makang sesuai jadwal

Cuma tidor yang nya sesuai jadwal